AMED - Hevserokê Giştî yê KCD’ê Berdan Ozturk bertek nîşanî astengkirinên alîkariyên Navenda Koordînasyona Krîzê da û wiha got: “Sedema mirina mirovên me ne erdhej lê ev pergal û hişmendiya mêtingeriyê ye. Yên ku alîkariyan asteng dikin jî xwedî hişmendiya mêtingerî û xespkirinê ne.” Qeymeqamê Bazarcix a Mereşê duh êvarê qeyûm tayîn Navenda Koordînasyona Krîzê ya Partiya Demokratîk a Gelan (HDP), rêxistinên civaka sivîl û komeleyên herêmî kir. Hevserokê Kongreya Civaka Demokratîk (KCD) Berdan Ozturk têkildarî astengkirina xebatên alîkarîyê û tayînkirina qeyûm, li Navenda Koordînasyona Krîzê ya HDP’ê ya li Peyas a Amedê daxuyanî da. ‘EM QEBÛL NAKIN’ Hevserokê KCD’ê Berdan Ozturk diyar kir ku heval û xebatkarên wan ji roja ewil ve bi fedekariyeke mezin xebatên xwe dimeşînin. Ozturk, destnîşan kir ku gelek kes bi dilxwazî tev li van xebatan bûne û wiha got: “Hemû hevalên me karekî baş kirin. Xwestin hindik jî be birînên mexdûrên erdhejê derman bikin. Qeymeqamtiya Bazarcixê xwest ku vê keda hevalên me yên fedekar xesp bike. Dixwazin alîkariyên hevalên me li ser navê xwe belav bikin. Em weke KCD’ê vî tiştî qebûl nakin. Me di daxuyaniya xwe ya ewil da jî gotibû ku em ê destûrê nedin ku desthilatdarî van kiryaran ji bo xwe weke amûra siyasetê bi kar bîne.” TAYÎNKIRINA QEYÛM ŞERMEZAR KIR Bi domdarî Ozturk bal kişand ser nêzikatiya îktîdarê ya li hemberî gelê kurd û wiha domand: “Desthilata AKP-MHP’ê ya faşîst biryarek dabû. Di 5’ê nîsana 2015’yan de tecrîda li ser Rêberê PKK’ê giran kirin û biryara şer dan. Pereyê xwe ji bo şerê li dijî kurdan xerc kirin û yên din jî dizîn. Lewma nekarîn mudaxaleyî erdhejê bikin. Heta sê rojên ewil jî neketibûn herêmên erdhejê. Piştre jî bi 3-4 kesan mudaxale kirin. Dewletê îflas kiriye û derfetên wê nemane ku mudaxaleyê bike. Dewlet jî, hikûmet jî, pergal jî tune ye. Dixwaze vê tunebûniya xwe jî li lser keda hevalên me yên kedkar û fedekar veşêre. Xwedî hişmeniya mêtingerî û xespkirinê ne. Em van sepanên wan şermezar dikin.” HEWCEHIYA BI DOMANDINA ALÎKARIYAN Di berdewamê de Ozturk got ku hewcehî bi domandina alîkairyan heye û ev tişt anî ziman: “Ev pêvajo, pêvajoyeke demdirêj e. Çi ji destê me were em ê bikin. Sedema mirina mirovên me ne erdhej lê ev pergal û hişmendiye ye. Heke pereyê ji bo şerê li dijî kurdan xerc dikin ji bo tevdîrên erdhejê xerc bikirana, dê ev qas kesan jiyana xwe ji dest nedabûna. Weke KCD’ê em dibêjin ku fikir û baweriya kê çi dibe bila bibe, em ê li cem gelê xwe cih bigirin. Ji destê me çi alîkarî bê, em ê bikin. Em spasiya tevahiya hevalên ku li 10 navendên koordînasyonê dixebitin dikin. Berpirsyarê vê karesatê serokkomar û hikûmet e. Em ê hesabê ji wan bipirsin. Li hêla din em ê xebatê xwe bidomînin. Ev rewşekî însanî ye û divê hemû kes bertekan nîşanî astengkirina alîkariyan bide.” Daxuyanî bi pirs û bersivan bi dawî bû.