AMED ÖTEKİLERİN GÜNDEMİ- Programê DTSO'yî ke seba wendekaranê ke dersa kurdkê weçînaya, tabletî vila kerdî, tede qisey kerd û bale ante mihîmîya ziwanê dayîke û dîyar kerd ke ê do seba ziwanê dayîke bixebitîyê û paştî bidê.
Kampanyaya DTSO'yî ke seba wendekaranê ziwanê kurdkî tabletî vila kerdî, program ÇandAmed (Merkezê Kongreyî yê Sezaî Karakoçî) de ame organîzekerdene. Hemşaredarê Şariştanê Girdî yê Amedî Dogan Hatun, Hemşaredara Yenîşehîrî Safîye Akdag, serekê DTSO'yî Mehmet Kaya û temsîlkarê rêxistinanê sivîlan û wendekarî beşdarê programî bîyî.
Hemşaredar Hatun: Ma do hetkarîya şarê xo bikê
Hemşaredar Dogan Hatun bale ante mihîmîya ziwanê dayîke û va; "Ma sey Şaredarîya Bajarê Girdî yê Amedî do wayîrê ziwanê xo bibê. Ma do bi 17 şaredarîyanê xo kam bi ziwanê dayîke biwazo ke xebate biko, biwazo kursêk akero, ma do hemînan rê paştî bidê. Ma tîya ra sozê ci danê. Ma sozê ziwanê xo danê. Her dare kokê xo ser o yena, însanî zî bi ziwanê xo est benê.
‘Gedeyî ziwanê dayîke nêmusê, no problem o’
Hatunî dîyar kerd ke xebata DTSO'yî zaf muhîm a û va; "Gedeyî şênê 2-3 ziwanî pîya bimusê, şênê tirkî, îngîlîzkî erebkî bimusê qet probleman nîyo la eke ziwanê dayîke zî nêmusê no problem o."
Serekê DTSO'yî Mehmet Kayayî zî derheqê ziwanê dayîke de qisey kerd û 700 wendekaran rê tabletî vila kerdî.
